Dilqəm və Şahbaz bizə görə çox narahatdırlar

Tərtərin Qapanlı kəndində iki dəfə olmuşam həyatımda… Hər dəfə cəbhədəki həyəcanlı xəbərləri televiziya ekranlarından izləyəndə bu kənd barədə eşidirdim. Yoxsa, bu ad mənə müharibə, həyəcan, ölüm-itim və güllə səslərindən başqa heç bir şeyi xatırlatmırdı…

İlk dəfə bu ilin Aprel ayının əvvəllərində Qapanlıda oldum və nüfuzlu Əl-Cəzirə kanalının çəkiliş qrupu ilə bu kəndə yollandıq, reportajlar yayımladıq… Qapanlıya ikincə səfərim də müharibə ilə bağlı idi. Bu dəfə azərbaycanlı əsirlərimiz Dilqəm Əsgərov və Şahbaz Quliyev barədə sənədli film çəkilişləri zamanı ora yollandıq…

Qapanlı kəndində Şahbazın anası yaşayan evi soruşanda hamı göy rəngli darvazanı göstərdi, 5-6 yerdən mərmi deşmiş bu darvazadan içəri girən kimi bizi ağbirçək bir ana qarşıladı… Sənəm xala.

qapanli1 qapanli

Sənəm xalaya gəlişimizin əsl səbəbini deyə bilməzdik. Çünki, iki ildir Şahbazı görməyən anası oğlunun Rusiyada olduğunu və iş dalınca getdiyini bilir… Odur ki, elə-belə qonaq gəldiyimizi deyib, havadan-sudan danışırdıq…

Amma ana ürəyi nəsə hiss etmişdi, dil danışmasa da, gözlər tez-tez dolur və kövrəlirdi. Sənəm xala övladları barədə danışır, hamısı haqqında bir-bir məlumat verirdi, nədənsə Şahbazdan söz düşəndə bir az dayanır və dərindən ah çəkirdi. Bizi çaya qonaq edən Sənəm xala ilə danışmaq bizi də həyəcanlandırmışdı. Bircə kəlmə artıq söz anada şübhələr yarada bilərdi, ana ürəyi həssas olduğundan biz də dərinə getmədik.

Amma Sənəm xala ilə üzbəüz oturanda içimdə bir xəcalət hissi baş qaldırmışdı. Şahbazın artıq 2 ildir ki, əsirlikdə olmasına və davamlı işgəncələrə məruz qalmasına görə sanki özümü günahkar bilirdim. Mənə elə gəlirdi ki, mən nələrsə edə bilərəm, amma etmirəm – qorxuram, ya nədirsə, bilmirəm…

Əslində, əsirlərimizin hələ də düşmən əlində olmasının məsuliyyəti var boynumuzda. Biz Bakıda rahat şəkildə gəzəndə, 2 gündən sonra balkona çıxıb çay içə-içə Formula-1 yarışını seyr edəndə, Dilqəm və Şahbaz Şuşadakı türmənin kiçicik pəncərəsindən səmaya baxıb, Azərbaycan əsgərinin atacağı raketləri gözləyəcəklər. İnanacaqlar ki, Azərbaycan ordusu genişmiqyaslı müharibəyə başlayıb, Şuşaya qədər hər yeri darmadağın edəcək və əsirlərimizin saxlanıldığı o türmə də yerlə-yeksan olacaq.

Dilqəm və Şahbaz o dağıntıların altında qalsalar da, ruhən azad olacaqlar və Allahın qədərində ölmək varsa da, artıq bizim olan Qarabağda şəhid olacaqlar… erməni tapdağında qalmış Artsaxda yox!!!

PS. Əslində, Dilqəm və Şahbaz bizə görə çox narahatdırlar, gecə-gündüz bizi düşünürlər. Əbəs yerə… çünki bizdə hər şey yaxşıdır, heç onları düşünmürük…

Əhməd Şahidov
13 İyun 2016-cı il, saat 03:53, Bakı, Azərbaycan

Bu yazını Facebookda şərh et