Ukrayna münaqişəsi ətrafında son günlər formalaşan diplomatik dinamika, xüsusilə ABŞ-ın irəli sürdüyü sülh təşəbbüsünün məzmunu və Avropanın prosesdən kənar saxlanılması fonunda beynəlxalq ekspertlər arasında “Ukraynanın məğlubiyyətə məcbur edilməsi” ehtimalının gücləndiyi barədə fikirlər artmaqdadır. Vaşinqton–Moskva xəttində aparılan qapalı danışıqlar, cəbhədə Rusiyanın artan təzyiqi və Kiyevə qarşı intensivləşən raket hücumları müharibənin yalnız hərbi yox, həm də siyasi müstəvidə Ukraynanın sıxışdırıldığı təəssüratını yaradır. Dondurulmuş aktivlər, ordunun sayına limit və NATO perspektivinin zəifləməsi kimi bəndlər isə Kiyevin təhlükəsizlik arxitekturasını kökündən dəyişə biləcək risklər doğurur.
ARB24 Televiziyasına müsahibəsində siyasi şərhçi Əhməd Şahidov bildirib ki, ABŞ-ın təqdim etdiyi sülh planının müxtəlif versiyalarında Ukraynanın maraqlarına zidd ola biləcək elementlər yer alır və bunlar Kiyevin faktiki şəkildə məcburi güzəştlərə sürüklənməsi təsiri bağışlayır. Onun sözlərinə görə, Ukrayna ordusunun sayına limit qoyulması, NATO üzvlüyü imkanlarının arxa plana keçirilməsi, bəzi işğal olunmuş ərazilərin qeyri-müəyyən müddətə Rusiya nəzarətində qalması ehtimalı ölkənin uzunmüddətli təhlükəsizlik perspektivini ciddi şəkildə zəiflədir. Əhməd Şahidov qeyd edib ki, Avropa dövlətlərinin prosesdə yalnız “məhdud formatda” iştirakı, baxmayaraq ki, yardım yükünün əsas hissəsini məhz onların daşıması, Kiyevin diplomatik baxımdan tək buraxıldığı təəssüratını gücləndirir və bu da Ukraynanın masada itirəcəklərinin daha çox ola biləcəyinə işarədir.
Əhməd Şahidov əlavə edib ki, Ukrayna daxilində baş verən siyasi gərginlik – xüsusilə Prezident Administrasiyasının rəhbəri Andrey Yermakın istefası və korrupsiya qalmaqalı – Kiyevin danışıqlarda mövqeyini daha da zəiflədə bilər. Onun sözlərinə görə, Rusiyanın ardıcıl raket hücumları fonunda ABŞ və Rusiya arasında aparılan qapalı danışıqlar Ukraynanın öz iradəsi nəzərə alınmadan sülhə məcbur edilə biləcəyi barədə real narahatlıq yaradır: “Bu proses elə şəkildə aparılır ki, Ukrayna artıq subyekt yox, geosiyasi bazarlığın obyekti kimi görünməyə başlayır. Əgər qərarlar Kiyevin siyasi iradəsindən kənarda formalaşarsa, bu, Ukraynanın məğlubiyyətə məcbur edilməsi demək olacaq və belə bir sülh nə dayanıqlı, nə də ədalətli ola bilər.”
