Rusiya–Ukrayna münaqişəsi fonunda Cenevrədə aparılan danışıqlarda “ərazi güzəştləri” barədə yayılan məlumatlar beynəlxalq gündəmin əsas müzakirə mövzularından birinə çevrilib. ABŞ-ın hazırladığı sülh planında Ukraynanın işğal altındakı bəzi ərazilərdən imtina edəcəyi iddiaları, bunun qarşılığında təhlükəsizlik zəmanətləri və iqtisadi paket alacağı barədə yayılan detallar bölgədə narahatlıq doğurur. Xüsusilə “Rusiya aldığı əraziləri dünya tərəfindən tanıda biləcəkmi?” sualı geniş siyasi debat yaradır.
ARB24 Televiziyasına müsahibəsində siyasi şərhçi Əhməd Şahidov bildirib ki, beynəlxalq hüquq baxımından Rusiyanın Ukraynadan hər hansı ərazini rəsmi şəkildə qazanması mümkün deyil və dünya ölkələrinin böyük əksəriyyəti belə bir tanınmaya heç vaxt razılıq verməz. Onun sözlərinə görə, ABŞ-ın təklif etdiyi sülh çərçivəsi də bu gerçəkliyi dəyişmir: sənəddə “tanınma” deyil, yalnız “mövcud vəziyyətin fakt kimi qəbul olunması” kimi yumşaldılmış yanaşma var və bu, ərazi itkisinin hüquqi legitimliyi demək deyil. Şahidov vurğulayıb ki, Rusiya maksimum halda bu bölgələr üzərində “de-fakto nəzarəti” qorumağa çalışacaq, lakin beynəlxalq sənədlərdə bu ərazilər rəsmi şəkildə Rusiyanın xəritəsinə daxil edilməyəcək.
Əhməd Şahidov əlavə edib ki, Ukraynanın ərazi bütövlüyü BMT prinsipləri ilə təsbit olunub və dünyanın heç bir aparıcı gücü bu prinsipləri poza bilməz. Onun fikrincə, Cenevrə danışıqlarının nəticəsi Ukraynanın gələcək təhlükəsizlik arxitekturasını müəyyən edəcək və Kiyev üçün əsas məsələ yalnız torpaqların deyil, suveren qərarvermə hüququnun qorunmasıdır. Əhməd Şahidov bildirib ki, danışıqların növbəti mərhələsi region üçün kritik olacaq və sülhün hansı şərtlərlə mümkün olacağı yaxın günlərdə daha aydın görünəcək.
