ABŞ və İran arasında aparılan diplomatik danışıqlar regionda gərginliyin azaldılması və təhlükəsizlik mühitinin yaxşılaşdırılması baxımından beynəlxalq ictimaiyyətin diqqət mərkəzindədir. Xüsusilə Yaxın Şərqdə son aylarda baş verən hadisələr fonunda tərəflər arasında baş tutan görüşlərin nəticələri və mümkün perspektivləri aktuallıq kəsb edir. Məhz bu məsələ ilə bağlı siyasi şərhçi Əhməd Şahidov ARB24-ə açıqlama verib.
Əhməd Şahidovun sözlərinə görə, ABŞ və İran arasında baş tutan görüşlər təkcə iki ölkə münasibətləri üçün deyil, bütövlükdə regionun gələcək taleyi üçün də əhəmiyyətlidir. Siyasi şərhçi bildirib ki, tərəflər arasında dialoqun davam etdirilməsi Yaxın Şərqdə gərginliyin səngiməsi və yeni diplomatik formatların yaranması üçün imkan yarada bilər.
“Hazırda baş verən proseslər onu göstərir ki, hər iki tərəf müəyyən kompromisə gəlmək niyyətindədir. Xüsusilə enerji təhlükəsizliyi, sərhəd təhlükəsizliyi və regionda silahlı qarşıdurmaların qarşısının alınması məsələləri müzakirələrin əsas mövzusunu təşkil edir,” — deyə Əhməd Şahidov qeyd edib.
O, həmçinin vurğulayıb ki, bu prosesdə digər regional güclərin də mövqeyi və yanaşması nəzərə alınmalıdır. Çünki ABŞ-İran münasibətlərində baş verən istənilən dəyişiklik regionun digər dövlətlərinə və beynəlxalq güc mərkəzlərinə də təsirsiz ötüşməyəcək.
Siyasi ekspert hesab edir ki, əgər tərəflər arasında danışıqlar müsbət məcrada davam edərsə, bu, Yaxın Şərqdə humanitar vəziyyətin yaxşılaşmasına və iqtisadi əməkdaşlığın bərpasına da töhfə verə bilər.
Qeyd edək ki, ABŞ və İran rəsmiləri son günlər bir neçə dəfə dolayısı ilə dialoq aparıb və müəyyən məsələlərdə irəliləyiş əldə olunduğunu bildiriblər. İki ölkə arasında uzun illərdir davam edən qarşıdurmanın diplomatik həll yolları isə hələ də ciddi müzakirə mövzusudur.
