Siyasi gündəmin əsas mövzularından biri olan ABŞ-Rusiya münasibətləri yenidən diqqət mərkəzinə çevrilib. İstanbulda baş tutan və iki böyük gücün nümayəndələrinin iştirak etdiyi son görüş beynəlxalq ictimaiyyətin marağına səbəb olub. Görüş zamanı müzakirə olunan məsələlər, tərəflər arasında yaranmış gərginliklərin mümkün həlli yolları və bu proseslərin regiona, o cümlədən Cənubi Qafqaza təsirləri ekspertlər tərəfindən müxtəlif aspektlərdən təhlil olunur.
Mövzu ilə bağlı ARB24 Televiziyasına açıqlama verən siyasi şərhçi Əhməd Şahidov bildirib ki, İstanbul görüşü ABŞ və Rusiya arasında birbaşa dialoqun davam etdirilməsi baxımından mühüm əhəmiyyət daşıyır. Onun sözlərinə görə, bu cür danışıqlar təkcə iki ölkənin münasibətlərinə deyil, həm də Ukrayna müharibəsi fonunda formalaşan yeni beynəlxalq nizamın gələcəyinə ciddi təsir göstərə bilər.
Əhməd Şahidov əlavə edib ki, ABŞ və Rusiya arasında razılaşdırılacaq mümkün razılaşmalar, o cümlədən təhlükəsizlik zəmanətləri və regional risklərin azaldılması ilə bağlı öhdəliklər, Azərbaycanın da yerləşdiyi Cənubi Qafqaz regionuna birbaşa və dolayı təsirlər göstərə bilər.
