Rusiya Xarici İşlər Nazirliyinin rəsmisi Azərbaycan və Ermənistan arasında əsir və girovların dəyişdirilməsi məsələsinə münasibət bildirib.
“Dağlıq Qarabağ münaqişəsinin tərəfləri əsir və girovların dəyişdirilməsi məsələsində Rusiyaya müraciət edə bilərlər.” Bu barədə Rusiya Federasiyası XİN-in rəsmi nümayəndəsi Mariya Zaxarova tərəflər arasında qarşılıqlı etimad mühitinin yaradılması şərtləri barədə sualı cavablandırarkən deyib.
“Bu məsələlər müəyyən olunmuş konkret format çərçivəsində həll edilməlidir. Bu format mövcuddur və düşünmürəm ki, mənim tərəfimdən hər hansı siyasi qiymətin verilməsinə ehtiyac var. Bizim işlək mexanizmlərimiz var, ATƏT-in Minsk Qrupunun həmsədrləri var. Ehtiyac yaranarsa, müəyyən mexanizmlərin işə salınması məqsədilə onlar da tərəflərə əlavə dəstək verə bilərlər. Əgər tərəflərə müəyyən dəstək lazımdırsa, konkret olaraq, Rusiyanın dəstəyinə gərək varsa, problem ikitərəfli diplomatik kanallar vasitəsilə də öz həllini tapa bilər”
Məsələ ilə bağlı ARB 24 Televiziyasına açıqlama verən Azərbaycanlı Əsir və Girovlarla bağlı Məlumat Mərkəzinin koordinatoru Əhməd Şahidov rəsmi Moskvanın azərbaycanlı əsir və girovların dəyişdirilməsi məsələsində çox mühüm rol oynaya biləcəyini deyib: “Rusiya bu məsələdə çox mühüm rol oynaya bilər. Əvvəla ATƏT-in Minsk Qrupunun həmsədrlərindən biri kimi, həm də Cənubi Qafqaz reginonuna, xüsusən də Ermənistana çox effektiv təsir imkanlarına malik ölkə kimi Rusiyanın bu məsələdə edə biləcəkləri çoxdur. Azərbaycan onsuz da ötən ilin Noyabr ayından əsir və girovların dəyişdirilməsində “Hamının hamıya” prinsipini irəli sürüb və bu təklif bugün də aktualdır. Rəsmi Moskvanın bu təklifinin Ermənistan hökuməti tərəfindən müsbət qiymətləndirilməsi və məsələnin öz həllini tapması məqsədəuyğun olardı.”