İNANMIRAM

Yox, mən inanmıram bu nağıllara,

Bu boş ümidlərə, boş xəyallara.

Zərrə qədər yox qəlbimdə inamım

Bir saman çöpüdür dinim, imanım.

İnsanların sevgisi də yalandır,

Bir-birinə nifrəti də, kini də

Dostluqdakı ən sarsılmaz teli də,

Yalanla yoğrulub, mən inanmıram.

İnanmıram saf, dürüst məhəbbətə,

Vətənini sevənə inanmıram.

Vətən deyib üz tuturlar qürbətə

Qürbətdəki vətənə inanmıram.

İnanmıram Allah yaratsın bizi,

İstəsin ki, zülm çəkək dünyada.

Bir-birini oğurlayıb, öldürüb

Əzab verək, həsrət çəkək dünyada.

İnanmıram bu dünya bir sınaqdır,

Ki, dünyanın sonu olsun nəhayət,

Lap əzəldən bu dünya elə haqqdır

Boş söhbətdir nə cəhənnəm, nə cənnət!

Tək bir şeyə inanıram həyatda

Bu dünyada xəyanət var, yalan var.

Şan-şöhrətçün, beş-on manat pul üçün

Satqınlığı mücadilə sayan var.

Amma yenə inanıram həyata

İnanıram sevgi var olasıdır.

Əsas olan heç də məhəbbət deyil,

Məhəbbətə inamın olmasıdır.