ƏBÜLFƏZ ELÇİBƏYƏ

Sağlığında qiymət verə bilmədik,

Ölümün ayıltdı bizi qəflətdən.

Səndən sonra xoş gələcək görmədik

Sən idin millətin sabahı demək.

Millətin azadlıq ruhu sən oldun

Yığdın meydanlara bütöv bir xalqı

Qoruya bilmədik, günbəgün soldun

Tək səndən öyrəndik biz azadlığı.

Sən bu yer üzünə dahi tək gəldin

Heç sığa bilmədin səkkiz milyona

Bütün Türk dünyası sənə sığındı

Sən Böyük Turana böyük dayaqdın.

Qəlbin Təbriz ilə döyündü hər an

Bütöv Azərbaycan həsrətindəydin.

İnşallah, çin çıxar arzun bir zaman

Birləşər, bir olar xalqın, millətin.

Məzarın önündə dayanıb, durub

Düşünürəm, sənin sön günlərini

Ölüm ayağında arxadan vurub

Sənə ləkə yaxan o şərəfsizlər,

Vətəni, milləti bir pula satıb

Vicdandan dəm vuran mərifətsizlər

Görən utanırmı vicdan önündə?!

Səninlə başlanan bu mübarizə

Bu sevgi, bu həsrət heç zaman bitməz,

Birləşsə, bir olsa, ulu məmləkət

Doğulsa dünyaya yenə igidlər

Onlardan heç biri sənin tək sevməz

Millətin, bayrağın dəlicəsinə,

Qəbrin nurla dolsun, min rəhmət sənə!