ABŞ Prezidenti Donald Trampın Rusiya-Ukrayna müharibəsi, Ukrayna rəhbərliyinin siyasəti və hərbi yardım proqramları ilə bağlı səsləndirdiyi sərt bəyanatlar beynəlxalq mediada və siyasi dairələrdə ciddi müzakirələrə səbəb olub. Vaşinqtonla Kiyev arasında dərinləşən fikir ayrılıqları, xüsusilə PURL proqramı üzrə tədarüklərin dayandırılması təhlükəsi və Rusiyanın neft emalı zavodlarına zərbələrin endirilməsi qlobal təhlükəsizlik və enerji bazarları üçün yeni risklər yaradır.
Məsələ ilə bağlı ARB24 Televiziyasına danışan siyasi şərhçi Əhməd Şahidov bildirib ki, ABŞ-ın yeni administrasiyasının xarici siyasət kursu və prioritetləri qlobal miqyasda köklü dəyişikliklərə yol açır. Ekspert qeyd edib ki, Trampın Vladimir Putinlə dialoqa üstünlük verməsi və Volodimir Zelenskini açıq şəkildə tənqid etməsi Qərb koalisiyasının daxilində koordinasiyanın zəiflədiyini göstərir.
Əhməd Şahidov diqqətə çatdırıb ki, ABŞ və Avropa ölkələri arasındakı hərbi-logistik dəstək mexanizmlərində yaranan fasilələr Ukraynanın hava hücumundan müdafiə imkanlarını ciddi şəkildə məhdudlaşdıra bilər. Siyasi şərhçi vurğulayıb ki, mövcud qlobal gərginlik fonunda tərəflərin kompromisə gedə bilməməsi münaqişənin daha da uzanmasına və dünya iqtisadiyyatına mənfi təsirlərin artmasına səbəb olur.
