ABŞ-da noyabrın 3-də keçirilən Konqres seçkiləri ölkənin daxili siyasi həyatında mühüm hadisə olmaqla yanaşı, Donald Tramp administrasiyasının qarşıdakı iki ildəki fəaliyyətinə də təsir göstərəcək. Seçkilərin nəticələri Nümayəndələr Palatasında və Senatda siyasi qüvvələr balansını müəyyənləşdirəcək. Siyasi şərhçi və hüquq müdafiəçisi Əhməd Şahidov Real Televiziyasına müsahibəsində seçkilərin mümkün nəticələrini və ABŞ-ın gələcək siyasi kursuna təsirlərini şərh edib.
Əhməd Şahidov bildirib ki, Respublikaçıların Konqresdə çoxluğu qoruyub saxlaması Donald Tramp administrasiyasına qanunvericilik təşəbbüslərini həyata keçirmək üçün daha geniş imkanlar yaradacaq. Demokratların üstünlük əldə etməsi isə Ağ Ev ilə Konqres arasında siyasi rəqabəti gücləndirəcək, administrasiyanın qərarları üzərində parlament nəzarətini artıracaq. Onun sözlərinə görə, Konqresdəki siyasi balans ABŞ-ın büdcə, immiqrasiya, müdafiə və xarici siyasət məsələlərinə də birbaşa təsir göstərəcək.
Siyasi şərhçinin əsas diqqət çəkdiyi məqamlardan biri isə bu seçkilərin 2028-ci il prezident seçkiləri ilə əlaqəsidir. Əhməd Şahidovun fikrincə, Senat və Konqres uğrunda hazırkı mübarizə faktiki olaraq növbəti prezident seçkilərinə hazırlığın mühüm mərhələsidir. Hər iki siyasi düşərgə bugünkü nəticələrdən gələcək strategiyasını müəyyənləşdirmək, elektoratın mövqeyini qiymətləndirmək və 2028-ci il prezident seçkilərinə siyasi zəmin hazırlamaq üçün istifadə edəcək.
