İslamabadda ABŞ və İran arasında baş tutan birbaşa danışıqlar konkret razılaşma ilə nəticələnməsə də, tərəflər arasında təmasların davam etdirilməsi istiqamətində müəyyən zəmin formalaşıb. Hazırda regionda aktiv hərbi əməliyyatlar müşahidə olunmur və qismən də olsa, nisbi sakitlik davam edir. Bununla belə, Hörmüz boğazı ətrafında yaranmış vəziyyət əsas gərginlik nöqtəsi olaraq qalır və tərəflər növbəti danışıqlar raunduna hazırlaşır.
Siyasi şərhçi Əhməd Şahidov Real Televiziyasına müsahibəsində bildirib ki, İslamabad görüşü formal nəticə verməsə də, ümumilikdə uğurlu hesab oluna bilər: “Ən azından ABŞ və İran öz qırmızı xətlərini müəyyənləşdirdi və qarşı tərəfə açıq mesaj verdi”. Onun sözlərinə görə, hazırda aktiv hərbi əməliyyatların olmaması tərəflər arasında müəyyən pauzanın mövcudluğunu göstərir, lakin bu, rəsmi atəşkəs anlamına gəlmir və növbəti raund üçün hazırlıq gedir.
Əhməd Şahidov vurğulayıb ki, əsas problem Hörmüz boğazının statusu olaraq qalır: “İran bu boğazı milliləşdirməyə çalışır, ABŞ isə qısa müddətdə onun açıq və təhlükəsiz qalmasını təmin etmək istəyir”. Ekspert qeyd edib ki, ABŞ-ın boğazı tam mühasirəyə alması real görünmür, çünki Rusiya və Çin kimi ölkələrin gəmilərinə qarşı belə addımlar genişmiqyaslı eskalasiyaya səbəb ola bilər. Onun fikrincə, əgər indiki şərtlərdə hər hansı razılaşma əldə olunarsa, İran bunu öz qələbəsi kimi təqdim edəcək və regionda daha sərt siyasət yürüdəcək. Əks halda isə növbəti danışıqlar nəticə verməzsə, hərbi əməliyyatların yenidən başlanması ehtimalı yüksək olaraq qalır, baxmayaraq ki, ABŞ uzunmüddətli müharibədə maraqlı deyil və daha çox siyasi həll variantına üstünlük verir.
