8 avqustda ABŞ Prezidenti Donald Trampın təşəbbüsü ilə Vaşinqtondakı Ağ Evdə Azərbaycan Prezidenti İlham Əliyev və Ermənistan Baş naziri Nikol Paşinyan arasında uzun illər davam edən münaqişəni siyasi yolla həll edən tarixi görüş keçirildi. Görüşün nəticəsində tərəflər Cənubi Qafqazda sabitlik və əməkdaşlıq üçün yeni mərhələnin əsasını qoyan yekun sülh sazişi imzaladılar.
Diplomatik mənbələr bildirirlər ki, bu razılaşma Birləşmiş Ərəb Əmirliklərinin vasitəçiliyi ilə Abu-Dabidə aparılan intensiv danışıqların davamı olaraq əldə olunub. Vaşinqtondakı görüş isə ilkin razılaşmaları rəsmiləşdirərək, sülhün təminatı üçün konkret yol xəritəsini təsdiqlədi.
Donald Tramp administrasiyası bu nəticəni yalnız regional sabitlik baxımından deyil, həm də ABŞ-ın beynəlxalq vasitəçilik mövqeyinin möhkəmlənməsi kimi qiymətləndirir. Ağ Ev rəsmilərinə görə, imzalanan saziş Azərbaycan, Ermənistan və bütün Cənubi Qafqaz üçün yeni iqtisadi və siyasi imkanlar açacaq.
Bu tarixi mərhələ barədə Vaşinqtonda olan siyasi şərhçi Əhməd Şahidov ARB24 kanalına müsahibəsində geniş fikirlərini bölüşüb. Şahidov sülh sazişini region üçün əsl dönüş nöqtəsi kimi qiymətləndirib: “Bu, sadəcə diplomatik jest deyil, real nəticələr verəcək bir razılaşmadır. Donald Tramp bu prosesi şəxsi siyasi iradəsi ilə irəli apardı və məqsədi yalnız iki ölkə arasında barışıq yaratmaqla məhdudlaşmadı. Bu addım həm ABŞ-ın qlobal vasitəçi mövqeyini gücləndirəcək, həm də regionda uzunmüddətli sabitlik üçün möhkəm zəmin yaradacaq.”
Şahidovun sözlərinə görə, imzalanan sənəd yalnız münaqişənin bitməsi ilə kifayətlənmir. “Razılaşma iqtisadi əməkdaşlıq, sərhədlərin açılması, nəqliyyat və enerji dəhlizlərinin bərpası, humanitar əlaqələrin inkişafı kimi mühüm sahələri də əhatə edir. Bu, region ölkələrinin iqtisadi inteqrasiyasına, yeni ticarət yollarının açılmasına və insanların sərbəst hərəkətinə geniş imkanlar yaradacaq,” – deyə o, əlavə edib.
Müsahibədə həmçinin ABŞ-ın 907-ci maddənin dondurulması məsələsinə toxunan Əhməd Şahidov bildirib ki, bu addım Azərbaycan-ABŞ əlaqələrinin yeni mərhələsi üçün vacib siqnaldır. O qeyd edib ki, iki ölkə arasında əməkdaşlığın genişlənməsi üçün əlverişli zəmin yaranır.
Siyasi şərhçi Vaşinqtondakı diplomatik dairələrin bu tarixi uğuru yüksək qiymətləndirdiyini və sülhün davamlı olması üçün prosesə dəstəyin davam etdiriləcəyini vurğulayıb.
