Ermənistanda parlament seçkilərindən sonra ölkədə siyasi proseslərin yeni mərhələyə keçəcəyi gözlənilir. Baş nazir Nikol Paşinyanın rəhbərlik etdiyi hakim qüvvənin qələbəsindən sonra diqqətlər müxalifətə qarşı mümkün addımlara və daxili siyasi vəziyyətin inkişaf istiqamətinə yönəlib. Son aylarda bir sıra müxalif siyasətçilər və ictimai xadimlərə qarşı başladılan hüquqi prosedurlar da bu müzakirələri daha da aktuallaşdırıb.
Mövzu ilə bağlı ARB24 televiziyasına müsahibə verən siyasi şərhçi Əhməd Şahidov bildirib ki, seçkilərdə əldə etdiyi qələbədən sonra Nikol Paşinyan hakimiyyəti ölkə daxilində siyasi nəzarəti daha da gücləndirməyə çalışacaq. Onun sözlərinə görə, Paşinyan artıq seçki legitimliyini təmin edib və indi əsas məqsədi hakimiyyət üçün potensial təhlükə hesab etdiyi siyasi qüvvələrin təsir imkanlarını məhdudlaşdırmaq olacaq.
Əhməd Şahidovun fikrincə, yaxın aylarda Ermənistanda siyasi həbslər dalğasının şahidi olmaq mümkündür. Ekspert qeyd edib ki, xüsusilə müxalifət liderləri, keçmiş hakimiyyət nümayəndələri və Rusiyaya yaxın siyasi dairələrin təmsilçilərinə qarşı hüquqi və siyasi təzyiqlərin artacağı ehtimalı yüksəkdir. Onun sözlərinə görə, Paşinyan seçkilərdən sonra müxalif düşərgədə genişmiqyaslı təmizləmə aparmağa və daxili siyasi rəqiblərini zərərsizləşdirməyə çalışacaq.
