Deyirlər erkəklər ağlamaz,
amma mən deyilənlərə inanmıram
Odur ki, ağlamaq istəyirəm
bəlkə ürəyimi boşaltdım.
Yoxsa ki, hey içimə ata-ata
üzüldüm, əldən düşdüm lap.
Nə qədər haqsızlığa göz yumub
görmədim kimi davranacam.
Nə qədər sevgiyə inanıb
sevgisiz yaşayacam.
Nə qədər dostlarımın xəyanətini,
yoldaşlarımın fitnəsini dəf edəcəm.
Gücüm yoxdur artıq bütün bunlara
dözmək istəmirəm, sadəcə
ağlamaq istəyirəm.
İstəyirəm ağlayım, ağlayım, var gücümlə ağlayım
Qoy mənə gülsünlər,
qoy desinlər ki, kişi ağlamaz
Ürək ağlamaq üçündür
ağlamasa, daşa dönər
daşlaşar ürəyim.
Axı mən necə ağlamayım?!
Vətəni parçalanmış,
taleyi haçalanmış
haqqı taptanmış
şəxsiyyəti alçalmış
gələcəyi oğurlanmış
var-dövləti talanmış
xoşbəxtliyə susamış
insan necə ağlamasın?!
Odur ki, mən ağlayıram, dostlar!
Siz ağlamayın!
Kişi olun!
Vətəni parçalanmış,
taleyi haçalanmış
haqqı taptanmış
şəxsiyyəti alçalmış
gələcəyi oğurlanmış
var-dövləti talanmış
xoşbəxtliyə susamış kişi!
Sizin kimi kişilərə baxıb
ağlamaq istəyirəm.
Dostlar, mən ağlamaq istəyirəm!
Deyirlər erkəklər ağlamaz,
amma mən ağlayıram!
Əhməd ŞAHİDOV
17 Yanvar 2011-ci il, saat 03:40, Bakı, Azərbaycan