Dohada keçirilən beynəlxalq insan haqları konfransında ADİHİ rəhbəri Əhməd Şahidov da iştirak edir
Yanvarın 13-də Qətərin paytaxtı Doha şəhərində BMT-nin İnsan Haqları üzrə Ali Komissarlığı və Qətər Milli İnsan Haqları Komitəsinin birgə təşkilatçılığı ilə beynəlxalq insan haqları konfransı öz işinə başlayıb. “BMT-nin İnsan Haqları üzrə Ali Komissarlığının Ərəb Regionunda İnsan Haqlarının Təbliği və Qorunmasında rolu” adlı konfransda dünyanın dörd bir yanından tanınmış hüquq müdafiəçiləri və beynəlxalq ekspertlər iştirak edirlər.
Qətər Milli İnsan Haqları Komitəsinin rəhbəri Cənab Ali bin Samikh al Marri tədbiri açıq elan edərək, dünyada baş verən proseslər barədə məlumat verib və Ərəb dünyasında insan haqlarının qorunmasının vacibliyini qeyd edib.
Daha sonra çıxış edən BMT-nin İnsan Haqları üzrə Ali Komissarı Cənab Zeyd bin Raad insan haqlarının BMT üçün prioritet olduğunu və bütün dünyada yaşayan insanların haqlarının qorunması istiqamətində aparılan işlərdən danışıb.
Tədbirdə Ərəb Ölkələri Liqasının Baş Katibi Cənab Nabil əl Arabi, Körfəz Ölkələri Əməkdaşlıq Şurasının Baş Katibi Cənab Abdul Latif bin Raşid Al Zayani, Ərəb Parlamentinin Prezidenti Cənab Ahmad Muhammad Al-Jarvan, Ərəb Milli İnsan Haqları İnstitutları Şəbəkəsinin rəhbəri Cənab Mauza Breyzat və digər fəxri qonaqlar çıxış ediblər.
Konfransda yaxından iştirak edən Azərbaycan Demorkatiya və İnsan Haqları İnstitutunun rəhbəri Əhməd Şahidov müsəlman ölkələrində baş verən hadisələr barədə öz fikirlərini bölüşüb.
