Xəbər verildiyi kimi, Polşanın paytaxtı Varşava şəhərində keçirilən ATƏT-in İnsan Resurslarının Tətbiqi Müşavirəsində iştirak edən TURSAM Strateji Araşdırmalar Mərkəzinin rəhbəri Əhməd Şahidov Sentyabr ayının 26-da qurumun plenar iclasında “Azərbaycanda dini azadlıqlar” adlı məruzə ilə çıxış etmişdir.
Çıxışı zamanı Əhməd Şahidov Azərbaycanda mövcud dini tolerantlığın bütün dünyaya örnək ola biləcəyini bildirmiş və müxtəlif dinlərə məxsus insanların öz inanclarında müstəqil olduqlarını toplantı iştirakçılarının diqqətinə çatdırmışdır. TURSAM rəhbəri Əhməd Şahidov Azərbaycanda müsəlmanların böyük üstünlüyə malik olmalarına baxmayaraq, digər dünyəvi dinlərin – xristianlıq və musəviliyin də geniş yayıldığını və bu dinlərə ibadət edən insanların ölkədəki dini tolerantlıqdan razı qaldıqlarını söyləmişdir.
Əhməd Şahidovun sözlərinə görə, Azərbaycan dünyəvi, demokratik və unitar bir dövlətdir və din dövlətdən ayrıdır. Ölkədə mövcud dini dözümlüyü öz gözləri ilə görən bir sıra dini liderlər, habelə II Aleksey , Roma Papası və digər dini rəhbərlər Azərbaycana səfərləri zamanı çox məmnun qalmış və bütün dinlərə münasibətdə dövlətin bərabər davranmasını alqışlamışlar. Daha sonra Dağlıq Qarabağ konflikti barədə toplantı iştirakçılarına məlumat verən Əhməd Şahidov Ermənistanın işğalçı siyasəti nəticəsində 20% torpaqların itirilməsini və bir milyondan çox qaçqının öz dədə-baba torpaqlarından didərgin düşməsini diqqətə çatdırmış və həmin torpaqlarda onlarla məscid və kilsələrin ermənilər tərəfindən dağıdıldığını bildirmişdir. Erməni kilsəsinin rəhbəri I Vazgenin bir dini lider kimi deyil, daha çox müharibəyə çağırışlar edən separatçı kimi fəaliyyət göstərdiyini bildirən Əhməd Şahidov toplantıda iştirak edən Ermənistan nümayəndələrini sərt tənqid etmişdir.
Bundan sonra çıxış üçün söz alan Ermənistan nümayəndəsi TURSAM rəhbəri Əhməd Şahidovun çıxışını qəbuledilməz hesab etmiş və səslənən fikirlərlə razılaşmadıqlarını iddia etmişdir.
TURSAM rəhbəri Əhməd Şahidovun çıxışının tam mətni burada – http://www.osce.org/odihr/105744
