Əhməd Şahidov – “Mən yox, romanım qalib gələcək”
Qan Turalı: “MKM-də heç kimi özümə rəqib görmürəm”
Xəbər verildiyi kimi, Azərbaycanın ədəbiyyat sahəsində ən böyük layihə olan Milli Kitab Mükafatına (MKM) əsərlərin qəbulu başa çatıb. 28 avqust 2012-ci il tarixindən start götürən müsabiqəyə 241 əsər daxil olub. Onlardan 175-si nəsr əsəri, 58-i şeir, 8-i isə uşaq nağıllarıdır. Müsabiqəyə qatılanların 164 nəfəri kişi, 77-si qadındır. Ən gənc yazarın 7, ən yaşlı yazarınsa 86 yaşı var. Daha çox 20-25 yaşlı yazarlar üstünlük təşkil edir.
Əsərlər Azərbaycanın bütün bölgələrindən daxil olub. Türkiyə, İran, Ukrayna, Rusiya, ABŞ, Almaniya, İsveç, Böyük Britaniya, Hollandiyada yaşayan həmvətənlərimiz də öz əsərlərini müsabiqəyə təqdim ediblər.
MKM-in təqdimatı 9 təhsil ocağında və 6 bölgədə təşkil olunub. Mükafat ölkənin bütün televiziyalarında, o cümlədən regional kanallarda ətraflı işıqlandırılıb.
2013-cü il iyun ayının 4-də mükafatın qalibləri elan olunacaq. Münsiflərin rəyləri internet səhifədə açıqlanacaq. Ötən il olduğu kimi, bu dəfə də 1-ci yerin sahibi üç min, 2-ci yerə layiq görülən iki min, 3-cü yerin qalibi isə min manat pul mükafatı ilə təltif olunacaq. Qaliblərin kitabları həm kağız, həm elektron formatda çap olunacaq. Əlavə olaraq, ən yaxşı uşaq nağılının müəllifinə 300 manat, ən yaxşı gənc yazara 300 manat və ən yaxşı şeirə görə 300 manat məbləğində mükafat veriləcək. N.Köçərli konkret adlar çəkməyib.
MKM-ə əsər təqdim edənlər arasında kulis.az ədəbiyyat dərgisinin baş redaktoru Qan Turalı, gənc alim, yazar Əhməd Şahidov da var.
Bu müsabiqə barədə fikirlərini və gözləntilərini öyrənmək məqsədilə öncə Əhməd Şahidovla əlaqə saxladıq.
Müsabiqəyə “Sevdiyim qadın” romanı ilə qatıldığını söyləyən Əhməd bəy artıq bununla bağlı təbliğat işlərinə start verdiyini də dedi: “Kitablarım artıq şəhərimizin kitab mağazalarında satışda var. Bir çox ədəbiyyatçı dostlarıma, ziyalılara romanımı təqdim etmişəm. Yaxın günlərdə oxuyub rəylərini bildirəcəklər. Müsabiqədə uğur qazanacağıma inanıram”.
Müsabiqəyə 175 nəsr əsərinin təqdim edildiyini və rəqabətin qaçılmaz olduğunu bildirən müsahibimiz sağlam yarışdan çəkinmədiyini də qeyd etdi: “Bu, bir yarışdır, istedadların yarışı. Burada şəxslər yox, əsərlər yarışır. Mən uğur qazanacağıma əminəm. Daha doğrusu, mən yox, romanım qalib gələcək.”
“Sevdiyim qadın” romanının sevgi və romantikadan savayı, eyni zamanda bugünkü Azərbaycan reallıqları, ölkənin milli maraqları üzərində qurulduğunu qeyd edən Əhməd Şahidov nədənsə oxucuların daha çox romanın sevgi tərəflərini qabartdığını da vurğuladı: “Sevdiyim qadın” romanı təkcə məhəbbətdən bəhs etmir, burada rəqabət, siyasət, geopolitika və milli maraqlar özünəməxsus üslubda təsvir olunub. Amma oxucular yalnız romanın sevgi tərəflərini qabardırlar. Bu da ola bilsin ki, romanın adı ilə bağlıdır.”
Milli Kitab Mükafatında özünə rəqib kimsənin ola biləcəyi sualına isə Əhməd Şahidov birmənalı cavab vermədi və “Müsabiqəyə öz əsəri ilə qatılan Qan Turalı ilə rəqabət apara biləcəksinizmi?” sualını cavabsız qoydu: “Mən müsabiqəyə əsərimi təqdim etmişəm və ekspertlərin ilkin seçimini gözləyirəm. İnşallah, romanım ilk iyirmiliyə düşsün, sonra danışarıq. O ki qaldı kiminləsə rəqabət aparmağa, qoy əsərlər rəqabət aparsın”.
Kulis.az saytının baş redaktoru Qan Turalı MKM-ə “Mustafa” romanı ilə qatılıb. Modern.az-a açıqlamasında Qan Turalı kitabını MKM-ə təqdim etməsinin səbəbini belə izah edib:
“Öz əsərimin yüksək mənada təsdiqini tapması, bədii ədəbiyyat tarixində necə yer tutmasını öyrənmək üçün əsər verməmişəm. Yəni hesab etmirəm ki, mükafat almaqla o əsərin bədii əhəmiyyəti və keyfiyyəti müəyyənləşdiriləcək. Yenidən ədəbi prosesin gündəminə gəlməsi, gündəmdə qalması, oxunması, insanların diqqətini cəlb etməsi üçün romanı təqdim etmişəm. Nəticə necə olsa da, mən bu nəticəni indidən qəbul edirəm”.
Yazar qeyd edib ki, heç kimi özünə rəqib görmür. “Çünki rəqiblərimin kim olduğundan xəbərsizəm. Kəşfiyyat aparmağa da ehtiyac görmürəm”.
Sevinc İltifatqızı, Modern.az